पारगाव प्रतिनिधी:
दत्तात्रयनगर पारगाव (ता. आंबेगाव) येथील भीमाशंकर सहकारी साखर कारखान्यामार्फत महाराष्ट्र राज्याचे माजी गृहमंत्री व कारखान्याचे संस्थापक, आ. दिलीपराव वळसे पाटील यांच्या मार्गदर्शनाखाली संचालक मंडळाच्या निर्णयानुसार लागवड हंगाम २०२३-२४ मधील ऊस लागवड धोरणाची अंमलबजावणी १ जूनपासून सुरु करण्यात येणार असल्याची माहीती कारखान्याचे चेअरमन बाळासाहेब बेंडे यांनी दिली.
कारखाना कार्यक्षेत्रातील सभासद व ऊस उत्पादक यांना मागणीप्रमाणे उपलब्धतेनुसार १ जून २०२३ पासून वरील ऊस जातीचे बेणे वाटप करण्यात येणार आहे. त्यासाठी ऊस उत्पादक शेतकऱ्यांनी ऊस लागवड करावयाच्या क्षेत्राचा ७/१२ उतारा व आवश्यक कागदपत्रे पुर्तता संबधित विभागीय गट कार्यालयात देऊन बेणे मागणी नोंदवावी. खासगी ऊस लागवड केलेल्या शेतकऱ्यांनी चार दिवसाचे आत संबंधित गट ऑफिसला येवून ऊस नोंद करावयाची आहे. त्यानंतर उशीरा ऊस लागवड नोंद करणेस आलेल्या ऊस उत्पादकांची ऊस नोंदीसाठी आलेची तारीख हीच ऊस लागवड तारीख म्हणून नोंद करण्यात येईल.
कारखान्यामार्फत कार्यक्षेत्र व परिसरामध्ये धोरणानुसार उधारीने / रोखीने राबविणेत येणाऱ्या ऊस विकास योजने अंतर्गत माती परीक्षण सुविधा, ताग बियाणे वाटप, रासायनिक खते पुरवठा, द्रवरुप जीवाणू खते, ऊस रोपे, बायोकंपोष्ट / प्रेसमड, खोडवा व्यवस्थापनामध्ये पाचट कुट्टी सुविधा, ठिबक सिंचन योजना, व्हीएस.आय.चे मल्टीमायक्रोन्युट्रीएंट, मल्टीमॅक्रोन्युट्रीएंट, ह्युमिक अॅसिड, वसंत उर्जा, जैविक कीटकनाशक बी.व्ही.एम., ई.पी.एन. इ.चा पुरवठा, खासगी ऊस लागवड अर्थसहाय्य, ऊस पिक स्पर्धा इ. ऊस विकास योजनांचा लाभ सर्व ऊस उत्पादकांनी घेणेत यावा. ऊस पिक स्पर्धे अंतर्गत एकरी जास्तीत जास्त उत्पादन घेणाऱ्या शेतकऱ्यानी आपली प्रवेश शुल्क फि रु.१००/- सप्टेंबर २०२३ अखेर भरुन नाव नोंदणी करावी.
ऊस लागवडीसाठी १ जून २०२३ ते ३१ मार्च २०२४ अखेर पर्यंतच्या कालावधीमध्ये को.८६०३२, को.व्हि.एस.आय.१८१२१, पिडीएन १५०१२, को.एम.११०८२ या ऊस जातींच्या लागवडीस परवानगी देण्यात आली आहे. १ जून २०२३ ते ३० ऑक्टोबर २०२३ अखेर पर्यंतच्या कालावधीमध्ये को.एम.०२६५ या ऊस जातींच्या लागवडीस परवानगी देण्यात आली आहे. १ ऑगस्ट २०२३ ते ३१ मार्च २०२४ अखेर पर्यंतच्या कालावधीमध्ये व्हि.एस.आय.०८००५ या ऊस जातींच्या लागवडीस परवानगी देण्यात आली आहे. १ सप्टेंबर २०२३ ते ३१ मार्च २०२४ अखेर पर्यंतच्या कालावधीमध्ये एम.एस.१०००१, को.९०५७ या लवकर पक्व होणाऱ्या ऊस जातींच्या लागवडीस परवानगी देण्यात आली आहे. (बाळासाहेब बेंडे, चेअरमन)
ऊस पिकामध्ये हुमणी कीडीचा प्रादुर्भाव टाळणेसाठी गोळा केलेले हुमणी कीडीचे भुंगेरे कारखान्यामार्फत प्रति किलो रु.३००/- प्रमाणे जून २०२३ अखेर खरेदी केले जाणार असून हुमणीचे भुंगेरे गोळा करुन एकात्मिक कीडनियंत्रण करावे. या लागवड धोरणानुसार जास्तीत जास्त शेतकऱ्यांनी उसाची लागवड करावी व कारखाना ऊस विकास योजनांची अधिक माहितीसाठी विभागीय शेतकी कार्यालयाशी संपर्क साधावा. (प्रदीप वळसे, पाटील, व्हा. चेअरमन)