पुणे प्रतिनिधी:
जुन्या
मुंबई-पुणे राष्ट्रीय महामार्गावर कार्ला फाट्याजवळ शिलाटणे गावच्या हद्दीत भरधाव
वेगाने जाणाऱ्या कंटेनरने पुढे जाणाऱ्या एका मोटारसायकलला मागून जोरात धडक
दिल्याने भीषण अपघात झाला आहे. या भीषण अपघातात मोटारसायकल वरील तीन वर्षांच्या
बालकासह आईचा जागीच मृत्यू झाला असून, वडील गंभीर जखमी झाले आहेत. हा अपघात सोमवारी सायंकाळी सहाच्या
सुमारास झाला आहे. पुष्पा पवन शर्मा (वय.२६ वर्ष), युवराज पवन शर्मा (वय.३ वर्ष) असे अपघातात मृत्यू झालेल्या मायलेकांची
नावे असून, पवन गणपतीलाल
शर्मा (वय.२७ वर्ष) तिघेही सध्या
रा.निगडी, मूळ रा. राज्यस्थान असे गंभीर जखमी झालेल्यांचे
नाव आहे.
लोणावळा
ग्रामीण पोलिसांनी दिलेल्या माहितीनुसार, पवन शर्मा हे त्यांच्या मोटारसायकलने त्यांची पत्नी पुष्पा व त्यांचा तीन
वर्षाचा लहान मुलगा युवराज हे तिघे लोणावळ्यात फिरायला आले होते. लोणावळ्यात फिरून
झाल्यानंतर ते पुन्हा निगडीला घरी चालले होते. कार्ला फाट्याजवळ शिलाटणे गावच्या
हद्दीत त्यांच्या मोटारसायकलला मागून भरधाव वेगात आलेल्या कंटेनरने जोरात धडक
दिली. या भीषण धडकेत मोटारसायकलवरील तीन वर्षांच्या बालक आणि त्याची आई व वडील
मोटारसायकलसह मार्गावर फेकले गेले.
या भीषण घटनेत
युवराज व त्याची आई पुष्पा यांना गंभीर दुखापत झाल्याने त्यांचा जागीच मृत्यू झाला
झाला. तर वडील पवन शर्मा हे गंभीर जखमी झाले आहेत. अपघाताची माहिती मिळताच लोणावळा
ग्रामीण पोलिसांनी घटनास्थळी धाव घेत घटनेची पाहणी करून अपघातग्रस्त वाहने बाजूला
करून वाहतूक सुरळीत केली. त्यापूर्वी स्थानिकांनी जखमी झालेल्या पवन शर्मा यांना
उपचारासाठी कामशेत येथील एका खासगी रुग्णालयात दाखल केले. अपघातानंतर कंटेनर चालक
घटना स्थळावरून पळून गेला आहे. या घटनेचा पुढील तपास लोणावळा ग्रामीणचे पोलीस
कर्मचारी शरद जाधव हे करीत आहेत.
